پاکستان اور یو اے ای کے درمیان ویزا استثنیٰ سمیت تین اہم معاہدے
پاکستان اور یو اے ای کے درمیان ویزا استثنیٰ سمیت تین اہم معاہدے
پاکستان اور متحدہ عرب امارات (یو اے ای) نے سفارتی اور سرکاری پاسپورٹ رکھنے والے افراد کے لیے ویزا سے استثنیٰ کا معاہدہ کر لیا ہے۔ اس بات کا اعلان پاکستان کے نائب وزیراعظم اور وزیر خارجہ اسحاق ڈار نے بدھ کے روز کیا۔
یہ معاہدہ ابو ظبی میں منقعد ہونے والے پاکستان-یو اے ای مشترکہ وزارتی کمیشن (JMC) کے بارہویں اجلاس کے دوران طے پایا، جس کی صدارت اسحاق ڈار اور یو اے ای کے وزیر خارجہ شیخ عبداللہ بن زاید النہیان نے مشترکہ طور پر کی۔
اسحاق ڈار نے ایک سوشل میڈیا پوسٹ میں تصدیق کی کہ اس اجلاس کے دوران تین یادداشتِ تفاہم (MoUs) پر دستخط کیے گئے۔ ان میں ویزا استثنیٰ، مصنوعی ذہانت اور ڈیجیٹل معیشت میں تعاون، اور مشترکہ سرمایہ کاری کو فروغ دینے کے لیے ایک فریم ورک کی تشکیل شامل ہے۔
اجلاس میں دونوں ممالک کے درمیان دوطرفہ تعاون میں پیش رفت کا جائزہ لیا گیا اور تجارت، سرمایہ کاری، توانائی، انفراسٹرکچر، اور انفارمیشن ٹیکنالوجی جیسے شعبوں میں تعاون کو مزید وسعت دینے پر غور کیا گیا۔ دونوں فریقوں نے ادارہ جاتی روابط کو مضبوط بنانے اور وزارتوں کے درمیان رابطے کو فروغ دینے کی ضرورت پر زور دیا تاکہ منصوبوں پر عمل درآمد کی رفتار تیز ہو۔
یو اے ای اب بھی پاکستانی محنت کشوں کے لیے دنیا کی بڑی منزلوں میں سے ایک ہے۔ بیورو آف امیگریشن اینڈ اوورسیز ایمپلائمنٹ (BE&OE) اور اوورسیز ایمپلائمنٹ کارپوریشن (OEC) کے مطابق، 2024 میں 64,130 پاکستانیوں نے یو اے ای میں روزگار حاصل کیا، جو پاکستان کی رجسٹرڈ اوورسیز ورک فورس کا تقریباً 9 فیصد بنتا ہے۔
گزشتہ سال پاکستان سے کل 727,381 افراد بیرونِ ملک روزگار کے لیے روانہ ہوئے، جو ملک کی ترسیلات زر پر مبنی معیشت کی عکاسی کرتا ہے۔
Comments
Post a Comment